GUL-E-RANGEEN BY ALLAMA IQBAL|گل رنگیں-علامہ اقبال

 

گل رنگیں-علامہ اقبال
GUL-E-RANGEEN BY ALLAMA IQBAL

 

تُو شناسائے خراشِ عقدۂ مشکل نہیں

اے گلِ رنگیں ترے پہلو میں شاید دل نہیں

زیبِ محفل ہے ، شریکِ شورشِ محفل نہیں

یہ فراغت بزمِ ہستی میں مجھے حاسل نہیں

 

اس چمن میں مَیں سراپا سوزِ سازِ آرزو

اور تیری زندگانی بے گُدازِ آرزو

 

توڑ لینا شاخ سے تجھ کو مرا آئیں نہیں

یہ نظر غیر از نگاہِ چشمِ صورت بیں نہیں

آہ! یہ دستِ جفا جو اے گلِ رنگیں نہیں

کس طرح تجھ کو سمجھاؤ ں کے میں گل چیں نہیں

 

کام مجھکو دیدۂ حکمت کے اُ لجھیڑوں سے کیا

دیدۂ بلبل سے میں کرتا ہوں نظّارہ ترا

 

سو زبانوں پر بھی خاموشی تجھے منظور ہے

راز وہ کیا ہےترے سینے میں جو مستور ہے

میری صورت تُو بھی اک برگِ ریاضِ طُور ہے

میں چمن سے دُور ہوں، تُو بھی چمن سے دور ہے

 

مطمٔن ہے تو،پریشاں مثلِ بُو رہتا ہوں میں

زخمیِ شمشیرِذوقِ جستجو رہتا ہوں میں

 

یہ پریشانی مری سامانِ جمعِیّت نہ ہو

یہ جگر سوزی چراغِ خانٔہ حکمت نہ ہو

ناتوانی ہی مری سرمایۂ قُوّت نہ ہو

رشکِ جامِ جم مرا آ یٔنۂ حیرت نہ ہو

 

 

یہ تلاشِ مُتصل شمعِ جہاں افروز ہے

تَوسنِ ادراک انساں کو خرام آموز ہے