Laa Ilaaha Illallaah By Allama Iqbal|لا الہ الا اللہ -علامہ اقبال

لاَ اِلٰہَ اِلاّ اللہ -علامہ اقبال
Laa Ilaaha Illallaah By Allama Iqbal

 

خودی کا سَرِّ نہاں لاَ اِلٰہَ اِلاّ اللہ

خودی ہے تیغ،فَساں  لاَ اِلٰہَ اِلاّاللہ

 

یہ دَور اپنے براہیم  کی تلاش  میں ہے 

صنم کدہ ہے جہاں ، لاَ اِلٰہَ اِلاّاللہ

 

کِیا  ہے تُو نے متاعِ غُرور کا سَودا

فریب سُود و زیاں ، لاَ اِلٰہَ اِلاّاللہ

 

یہ مال و دولتِ دُنیا ،یہ رشتہ و پیوند

بُتانِ وہم  و گُماں ، لاَ اِلٰہَ اِلاّاللہ

 

خِرَد ہو ئی  ہے زمان ومکاں کی زُنّاری

نہ ہے  زماں  نہ مکاں ، لاَ اِلٰہَ اِلاّاللہ

 

یہ  نغمہ فصلِ گُل  ولالہ  کانہیں  پابند

بہار ہو کہ خزاں ، لاَ اِلٰہَ اِلاّاللہ

 

اگر چہ بُت  ہیں جماعت  کی آستینوں میں

مجھے ہے  حُکمِ اذاں ، لاَ اِلٰہَ اِلاّاللہ