Mirza Ghalib By Allama Iqbal|مرزا غالب-علامہ اقبال

 

مرزا غالب ؔ-علامہ اقبال
Mirza Ghalib By Allama Iqbal

 

فکرِ انساں پر تری ہستی سے یہ روشن ہُوا

ہے پرِ مرغِ تخیل کی رسائی تا کُجا

تھا سراپا روح تُو ،بزمِ سخن پیکر ترا

زیبِ محفل رہا،محفل سے پنہاں بھی رہا

 

دید تیری آنکھ کو اُس حُسن  کی منظور ہے

بن کے سوزِ زندگی ہر شے میں جومستور ہے

 

محفلِ ہستی تری بربط سے ہے سرمایہ دار

جس طرح نّدی  کو نغموں سے سکوتِ کوہسار

تیری فردوسِ تخیل سے ہے قدرت کی بہار

تیری کِشتِ فکر سے اُگتے ہیں عالمَ سبزہ وار

 

زندگی مُضَمر ہے تیری شوخیِ تحریر میں

تابِ گویائی سے جنبش ہے لبِ تصور میں

 

نطق کو سَو ناز ہیں تیرے لبِ اعجاز پر

محوِ حیرت  ہے ثریاّ رفعت ِ پرواز پر

شاہدِ  مضمون تصدّق ہے تیرے انداز پر

خندہ زن ہے حنچہ دِلیّ گُلِ شیراز پر

 

آہ ! تو اُجڑی  ہوئی دِلی  میں  آرامیدہ

گلشنِ ویمر میں تیرا ہم نوا خوا بیدہ ہے

 

لطفِ گویائی میں تیری ہمسری ممکن نہیں

ہو تخیل کا نہ جب تک فکرِ کامل ہم نشیں

ہائے! اب کیا ہوگئی ہندوستاں کی سرز میں

آہ! اے نظّار آموزِ نگاہِ نکتہ بیں

 

گیسوئے اُردو ابھی منّت پزیرِ شانہ ہے

شمع یہ سودائیِ دِلسوزیِ پروانہ ہے

 

اے جہاں آباد ! اے گہوارہ علم و ہنر

ہیں سراپا نالہ خاموش تیرے بام و ہ در

ذرّے ذرّے  میں تیرے خوابیدہ ہیں شمس و قمر

یوں تو پوشیدہ ہیں تیری خاک میں لاکھوں ُگہر

دفن تجھ میں کوئی فخر ِ روز گار ایسا بھی ہے؟

تجھ میں پنہاں کوئی موتی آب دار ایسا بھی ہے؟