Sada-e-Dard By Allama Iqbal|صدائے درد-علامہ اقبال

 

صدائے درد-علامہ اقبال

Sada-e-Dard By Allama Iqbal

 

جل رہا ہوں کل نہیں پڑتی کسی پہلو مجھے

ہاں ڈبو دے اے محیطِ آپ گنگا تُو مجھے

سرز میں اپنی قیامت کی نفاق انگیز ہے

وصل کیسا، یاں تو اک قُربِ فراق انگیز ہے

بدلے یک رنگی کے یہ نا آشنائی ہے غضب

ایک ہی خرمن کے دانوں میں جدائی ہے غضب

جس کے پھولوں میں اخّوت کی ہَوا آئی نہیں

اُس چمن میں کوئی لطفِ نغمہ پیرائی نہیں

لّذتِ قُربِ حقیقی پر مِٹا جاتا ہُوں میں

اِختلاطِ موجہ و ساحل سے گھبراتا ہُوں میں

دانہ خرمن نما ہے شاعرِ  معجِزبیاں

ہو نہ خرمن ہی تو اس دانے کی ہستی پھر کہاں

حُسن ہو کیا خود نما جب کوئی مائل ہی نہ ہو

شمع کو جلنے سے کیا مطلب جو محفل ہی نہ ہو

ذوقِ گویائی خموشی سے بدلتا کیوں نہیں

میرے آئینے سے یہ جو ہر نکالتا کیوں نہیں

کب زباں کھولی ہماری لذّتِ گفتار نے!

پھونک ڈالا جب چمن کو آتشِ پیکار نے