Sawaria By Nazeer Akbarabadi|سواریاں-نظیرؔاکبر آبادی

 

سواریاں-نظیرؔاکبر آبادی
Sawaria By Nazeer Akbarabadi

 

کیاکیا جہاں میں اب ہیں ہماری سواریاں

دل چسپ ، دل  فریب ،پیاری  سوا ریاں

کس کس طرح کی ہم نے سنواری سوا ریاں

پر ہم سے کچھ  نہ کر گئیں  یاری سو اریاں

 

جب چار کاندھے  پر ہو ئیں بھاری سواریاں

جَھک مارتی  یہ رہ گئیں  ساری سواریاں

 

وہ تخت ،جس پہ کل تھا جوا ہر جڑا ہوا

کس عیش  سے چڑھے  ہو ئے  پھرتے  تھے  جابہ جا

جس دم اجل  نے تختے  کے  اوپر   دیا سُلا

اُس تخت  کے بھی ہو گئے  تختے  جُدا جُدا

 

جب چار کاندھے  پر ہو ئیں بھاری سواریاں

جَھک مارتی  یہ رہ گئیں  ساری سواریاں

 

ہاتھی ،جو تھے پہا ڑ  کے مانند تن سیاہ

جن پر کسیں  عماریاں  رخشندہ ،رشکِ ماہ

ہو دوں  کی بھی  چمک  پہ ٹھر تی نہ تھی  نگاہ

کس عیش سے چڑھے  ہو ئے پھرتے تھے واہ واہ

 

جب چار کاندھے  پر ہو ئیں بھاری سواریاں

جَھک مارتی  یہ رہ گئیں  ساری سواریاں

 

وہ پالکی  بنی تھی سنہری جو زر نگار

جھا لر پہ جس کی، ہو تے تھے مو تی  پڑے  نثار

لا ،نالکی پہ موت نے جب  کر لیا سوار

پھر وہ نہ پالکی ،نہ وہ  جھا لر ،نہ وہ کہار

 

جب چار کاندھے  پر ہو ئیں بھاری سواریاں

جَھک مارتی  یہ رہ گئیں  ساری سواریاں

تھیں وہ رتھیں  کہ بیٹھے  تھے جن جن  میں پھیل پھیل

بجتے تھے زنگ ،اور تھے کلس اُن کے  جوں سُہیل

رستھ  بان  نے اجل کے جوں  ہی کر لیا دبیل

پھر کسی  کی چھتری ،پہیے  کہاں، اورکہاں  کے بَیل

 

جب چار کاندھے  پر ہو ئیں بھاری سواریاں

جَھک مارتی  یہ رہ گئیں  ساری سواریاں

 

گُھڑ  بہل ،فیل  بہل ،شتر بہل،راہ وار

ہرنوں کی بہل ،بکری  بہل ،گھنٹے  گُھنگر ودار

مالک چڑھا جو موت کی ڈولی  پہ ایک  بار

پھر بہل باں، نہ بہل ،نہ جھنکار ،نہ پکار

 

جب چار کاندھے  پر ہو ئیں بھاری سواریاں

جَھک مارتی  یہ رہ گئیں  ساری سواریاں

 

میا نہ ،محا فہ ، اور وہ  چنڈول ، بگھّیاں

وہ پنیسیں ،وہ  بوچے ،وہ چو پالے  خوش  نشاں

مالک ہوا اجل  کے جو کھڑکھڑ یے  پر رواں

بو چا گیا ،نہ ساتھ  میا نہ  گیا،میاں

 

جب چار کاندھے  پر ہو ئیں بھاری سواریاں

جَھک مارتی  یہ رہ گئیں  ساری سواریاں

 

اَسوار ،جب  اجل کا ہُوا آن کر اسیر

گھو ڑے بھی ہنہنا تے  رہے سب  جوان دپیر

ہاتھی بھی خاک ڈالتے سر پر رہے حقیر

یہ بات  تو عیاں ہے،کہوں  کیا میاں نظیرؔ

 

جب چار کاندھے  پر ہو ئیں بھاری سواریاں

جَھک مارتی  یہ رہ گئیں  ساری سواریاں