Tawakkul Wo Tark Wo Tajreed By Nazeer Akbarabadi|تو کل وترک وتجرید-نظیرؔاکبرآبادی

 

تو کل وترک وتجرید-نظیرؔاکبرآبادی
Tawakkul Wo Tark Wo Tajreed By Nazeer Akbarabadi

 

جتنے تو دیکھتا ہے یہ پھل پھول ،پات ،بیل

سب اپنے اپنے کام کی  ہیں کر رہے جھمیل

ناتا ہے  یاں سوناتھ ،جو رشتہ  ہے سو نکیل

جو غم پڑے اُس کو تو اپنے  ہی تن پہ جھیل

 

گر ہے   فقیر  تو، تونہ رکھ یاں  کسی سے میل

یاں تو نبٹری  نہ بِیل ،پڑا  اپنے  سر پہ کھیل

 

یہ صو رتیں  جو دیکھے  ہے، مت  ان سے  دل لگا

برّیں ہیں سو تیاں ،اُنھیں  اے یار مت جگا

شجرہ ،کلاہ پھینک ،اڑادے جَھگا تَگا

آگے کو چھوڑنا تھ ،نہ پیچھے  کو رکھ پگا

 

گر ہے   فقیر  تو، تونہ رکھ یاں  کسی سے میل

یاں تو نبٹری  نہ بِیل ،پڑا  اپنے  سر پہ کھیل

 

جب تو ہوا فقیر ،تو ناتا  کسی سے کیا

چھوڑا کُٹم ،تو پھر رہا  رشتا  کسی سے  کیا

مطلب بھلا  فقیر کو بابا کسی سے کیا

دل بر کو اپنے  چھوڑ کے ،ملنا  کسی سے کیا

 

گر ہے   فقیر  تو، تونہ رکھ یاں  کسی سے میل

یاں تو نبٹری  نہ بِیل ،پڑا  اپنے  سر پہ کھیل

 

تیری نہ یہ زمین ہے،نے تیرا آسماں

تیرا نہ گھر نہ بار،نہ تیرا یہ جسم وجاں

اُس کے سوا کہ جس پہ ہوا تو فقیر  یاں

کوئی  ترا رفیق ،نہ ساتھی ،نہ مہرباں

 

گر ہے   فقیر  تو، تونہ رکھ یاں  کسی سے میل

یاں تو نبٹری  نہ بِیل ،پڑا  اپنے  سر پہ کھیل

 

دیتا ہے دل کو اپنے تو دے اُس کسی کے بات

جس یار سے کہ ہو ترے جیتے مُوئے  کا سات

اور یہ جو تجھ سے کرتے ہیں مل مل کے میٹھی بات

مارا پڑے گا ،دیکھ ،نہ کھا اِن کی آت گھات

 

گر ہے   فقیر  تو، تونہ رکھ یاں  کسی سے میل

یاں تو نبٹری  نہ بِیل ،پڑا  اپنے  سر پہ کھیل

 

یہ اُلفتیں  کہ ساتھ ترے آٹھ پہر یں

یہ الفتیں  نہیں ہیں ،مری جان ،قہر ہیں

جتنے یہ شہر دیکھے ہیں، جادو کے شہر ہیں

جتنی  مٹھا ئیاں ہیں، مری جان ،زیر ہیں

 

گر ہے   فقیر  تو، تونہ رکھ یاں  کسی سے میل

یاں تو نبٹری  نہ بِیل ،پڑا  اپنے  سر پہ کھیل

 

خو باں کے یہ جو چاند  سے مُنہ  پر کھلے  ہیں بال

مارا ہے تیرے  واسطے  صیّاد نے یہ جال

یہ بال بال اب ہے تری جان کا و بال

پھنسیوا خدا کے واسطے  اِس میں  نہ، دیکھو بھال

 

گر ہے   فقیر  تو، تونہ رکھ یاں  کسی سے میل

یاں تو نبٹری  نہ بِیل ،پڑا  اپنے  سر پہ کھیل

 

جس کا ہے تو فقیر،اُسی کو سمجھ تو یار

مانگے تو مانگ اُسی سے  تو کیا نقد کیا ادھار

دیوے تولے وہی، جو نہ دیوے  تو دم نہ مار

اُس کے سواکسی سے  نہ رکھ  اپنا کاروبار

 

گر ہے   فقیر  تو، تونہ رکھ یاں  کسی سے میل

یاں تو نبٹری  نہ بِیل ،پڑا  اپنے  سر پہ کھیل

 

دنیا  اِسے  نہ جان ،یہ دریا  ہے قہر دار

لاکھوں  میں، اِس  سے کو ئی  اتر کر ہوا نہ پار

جب تو بہا،تو پھر نہ ملے گا  تجھے کنار

ملّاح یاں نہ ناو نہ بَلّی ہے میرے یار

 

گر ہے   فقیر  تو، تونہ رکھ یاں  کسی سے میل

یاں تو نبٹری  نہ بِیل ،پڑا  اپنے  سر پہ کھیل

 

دنیا نہ کہ اسے،یہ طلسمات ہےمیاں

یہ جانور ،یہ باغ ،یہ گل زار ،یہ مکاں

شکلیں جو دیکھتا ہے ،یہ جادو کی ہیں  عیاں

سب کچھ  ترے تئیں ہے یہ دھو کے  کی ٹٹّیاں

 

گر ہے   فقیر  تو، تونہ رکھ یاں  کسی سے میل

یاں تو نبٹری  نہ بِیل ،پڑا  اپنے  سر پہ کھیل

 

کیا فا ئدہ ،اگر  تو ہوا  نام کا فقیر

ہو کر فقیر ،توبھی رہا جال میں اسیر

ایسا ہی تھا تو فقیر  کو ناحق  کیا حقیر

ہم تو اِسی  سخن  کے ہیں  قا ئل  میاں نظیرؔ

 

گر ہے   فقیر  تو، تونہ رکھ یاں  کسی سے میل

یاں تو نبٹری  نہ بِیل ،پڑا  اپنے  سر پہ کھیل