Tilisme Zindagi By Nazeer Akbarabadi|طلسم زندگی -نظیرؔ اکبر آبادی

 

طلسم زندگی -نظیرؔ اکبر آبادی
Tilisme Zindagi By Nazeer Akbarabadi

 

آہ کیا کہیے ، رہی یاں جب تلک  اپنی حیات

تھے بندھے  کیاکیا تعلّق اپنے جیتے  جی کے سات

جب مُوئے ،پھر تو کسی  نے آن کر پوچھی  نہ بات

زندگی  اپنی تھی کُل چو نسٹھ گھڑی  کی کا ئنات

 

اِتنے عرصے  ہی میں کیاکیا ہم پہ گُزری  واردات

رہ چلے  دنیا میں  ہم بھی  ایک دن  اور ایک رات

 

پھر اسی دن رات میں ہم  بادشاہ  بھی ہو چکے

صا حبِ  تاج  ونگیں،فرماں  روا بھی ہو چکے

مالکِ مُلک ومکاں، کشور کُشا بھی ہو چکے

عا جز و مفلس ،فقیروبے نوا بھی  ہو چکے

 

اِتنے عرصے  ہی میں کیاکیا ہم پہ گُزری  واردات

رہ چلے  دنیا میں  ہم بھی  ایک دن  اور ایک رات

 

پھر اسی دن رات میں ہم ہو گئے  حشمت پناہ

بخشی و میر  ووزیر  ومنشی  و دیوانِ شاہ

محتسب ،کُتوال ،قاضی ،صدر ،مفتی ،اہلِ جاہ

اِس قدر تو عمر ،جس  میں یہ تما شے ،واہ واہ

 

اِتنے عرصے  ہی میں کیاکیا ہم پہ گُزری  واردات

رہ چلے  دنیا میں  ہم بھی  ایک دن  اور ایک رات

 

پھر اسی دن رات  میں ہم  عارف  و کا مل  ہوئے

صا حب ِ کشف  و کرامت  اور روشن دل ہو ئے

عالم  و فا ضل ،فقیہ وجاہل و عامل ہوئے

تھی یہی فرصت، اِسی میں  خاک ،مٹّی ،گِل ،ہوئے

اِتنے عرصے  ہی میں کیاکیا ہم پہ گُزری  واردات

رہ چلے  دنیا میں  ہم بھی  ایک دن  اور ایک رات

  

پھر اِسی دن رات  میں کیا کیا بنا ئے ہم نے گھر

مسجد و تالاب ومندر ،حجرۂ و دیوار ودر

بیٹھ کر عشرت  بھی کی،  اور بھیک مانگی  در بدر

تھے مسا فر ،پھر اسی میں  کر گئے آخر سفر

 

اِتنے عرصے  ہی میں کیاکیا ہم پہ گُزری  واردات

رہ چلے  دنیا میں  ہم بھی  ایک دن  اور ایک رات

 

پھر اِسی رات میں ہم دل رُبا بھی ہو گئے

عا شق و فا سق ،اسیر و مبتلا بھی ہو گئے

پُر گنہ ،مست و خراب و پار  سا بھی ہو گئے

تھی یہی  فر صت ،اِسی  میں تھا جو ہو نا ،ہو گئے

 

اِتنے عرصے  ہی میں کیاکیا ہم پہ گُزری  واردات

رہ چلے  دنیا میں  ہم بھی  ایک دن  اور ایک رات

 

پیشے ہیں جتنے  جہاں میں، کیا  صغیر  وکیا کبیر

سب کیے  ہم نے میاں اِس حال میں ہو کر اسیر

طفل سے ٹھہرے جواں ،اور پھر  جواں سے بن  کے پیر

پھر اُسی  میں پیر ہوکر، مرگئے  آخر نظیرؔ

 

اِتنے عرصے  ہی میں کیاکیا ہم پہ گُزری  واردات

رہ چلے  دنیا میں  ہم بھی  ایک دن  اور ایک رات