Bilal By Allama Iqbal|بلال -علامہ اقبال

 

بلالؓ-علامہ اقبال

Bilal By Allama Iqbal

 

چمک اُٹھا جو ستارہ ترے مقدر کا

حَبش سے تجھ کو اُٹھا کر حجاز میں لایا

 

ہوئی اسی سے ترے غم کدے کی آبادی

تری غلامی کے صدقے ہزار آزادی

 

وہ آستاں نہ چھُٹا تجھ سے ایک دم کے لیے

کسی کے شوق میں تُو نے مزے ستم کے لیے

 

جفا جو عشق میں ہوتی ہے وہ جفا ہی نہیں

ستم نہ ہو تو محبت میں کچھ مزا ہی نہیں

 

نظر تھی صورت ِسلماںؓ ادا شناس تری

شرابِ دید سے بڑھتی تھی اور پیاس تری

 

تجھے نظارے کا مثلِ کلیمؑ سودا تھا

اویسؓ طاقتِ دیدار کو ترستا تھا

 مدینہ تیری نگاہوں کا نور تھا گویا

ترے لیے تو یہ صحرا ہی طُور تھا گویا

 

تری نظر کو رہی دید میں بھی حسرت ِدید

 خنک دلے کہ تپید و دمے نیا سائید

 

گری وہ برق تری جان ناشکیبا پر

کہ خنده زن تری ظُلمت تھی دست مویؑ پر

 

تپش ز شعلہ گرفتند و بر دلِ تو زدند

چہ برقِ جلوہ بخاشاکِ حاصل تو زدند!

 

اداےدید سراپا نیاز تھی تیری

کسی کو دیکھتے رہنا نماز تھی تیری

 

 اذاں ازل سے ترے عشق کا ترانہ بنی

 نماز اُس کے نظارے کا اک بہانہ بنی

 

خوشا وہ وقت کہ یثرِب مقام تھا اس کا

 خوشا وہ دور کہ دیدار عام تھا اس کا