Ilahi aql e khajsta pe ko zara si deewangi sikha de|الہی عقل خجستہ پے کو ذرا سی دیوانگی سِکھا دے

 

الہی عقل خجستہ پے کو ذرا سی دیوانگی سِکھا دے

Illahi aql e khajsta pe ko zara si deewangi sikha de

غزل –علامہ اقبال

Ghazal By Allama Iqbal

الہی عقل خجستہ پے کو ذرا سی دیوانگی سِکھا دے

اسے ہے  سودائے بخیہ  کاری ، مجھے سرِ پیرہن نہیں ہے

 

مِلا محبت کا سوز مجھ کو تو بولے صبح ِ ازل فرشتے

مثالِ شمعِ مزار  ہے تُو، تری کوئی انجمن نہیں ہے

 

یہاں کہاں ہم نفَس میّسر ، یہ دیس نا آشنا ہے اے دل!

وہ چیز تُو مانگتا ہے مجھ سے کہ زیرِ چرخِ کہن نہیں ہے

 

نرالا سارے جہاں  سے اس کو عرب کے معمارﷺ نے بنایا

بِنا ہمارے حصارِ مِلّت کی اتحادِ وطن  نہیں ہے

 

کہاں کا آنا ،کہاں کا جانا، فریب ہے امتیازِ  عقبیٰ

نمود ہر شے میں ہے ہماری،کہیں ،ہمارا وطن نہیں ہے

 

مُدیرِ ’مخزن‘ سے کوئی اقبالؔ جاکے میرا پیام کہہ دے

جو کام کچھ  کر رہی  ہیں قومیں ،اُنھیں  مذاقِ سخن نہیں ہے