Ishrat-e-Amroz By allama iqbal| عشرت امروز-علامہ اقبال

 

عشرتِ امروز- علامہ اقبال
Ishrat-e-Amroz By Allama iqbal

 

نہ مجھ سے کہہ کہ اجل ہے پیام ِعیش وسرور

 نہ کھینچ نقشہ کیفّیتِ شراب ِطہور

 

فراقِ حور میں ہو غم سے ہمکنار نہ تُو

 پری کو شیشہ الفاظ میں اُتار نہ تُو

 

مجھے فریفتہ ساقیِ جمیل نہ کر

 بیانِ حور نہ کر، ذکرِ سلسبیل نہ کر

 

مقام ِامن ہے جنت، مجھے کلام نہیں

شباب کے لیے موزُوں ترا پیام نہیں

 

شباب آہ! کہاں تک اُمیدوار رہے

 وہ عیش، عیش نہیں، جس کا انتظار رہے

وه حُسن کیا کہ جو محتاجِ چشمِ بینا ہو

 نمود کے لیے مّنت پذیرِ فردا ہو

 

عجیب چیز ہے احساس زندگانی کا

عقیدہ عشرتِ امروز، ہے جوانی کا