Tarana-e-Hindi By Allama Iqballترانہ ہندی-علامہ اقبال

 

ترانہ ہندی-علامہ اقبال

 Tarana-e-Hindi By Allama Iqbal

 

سارے جہاں سے اچھا ہندوستاں ہمارا

ہم بُلبلیں ہیں اس کی، یہ گلستاں ہمارا

 

غربت میں ہوں اگر ہم، رہتا ہے دل وطن میں

سمجھو وہیں ہمیں بھی، دل ہو جہاں ہمارا

 

پر بت وہ سب سے اونچا، ہمسایہ آسماں کا

 وہ سنتری ہمارا، وہ پاسباں ہمارا

 

 گودی میں کھیلتی ہیں اس کی ہزاروں ندیاں

گلشن ہے جن کے دم سے رشک جناں ہمارا

 

 اے آبِ رود گنگا ! وہ دن ہیں یاد تجھ کو؟

 اترا ترے کنارے ے جب کارواں ہمارا

 

 مذہب نہیں سکھاتا آپس میں بیر رکھنا

ہندی ہیں ہم وطن ہے ہندوستاں ہمارا

 

یونان و مصر و روما سب مِٹ گئے جہاں سے

 اب تک مگر ہے باقی نام و نشاں ہمارا

 

 کچھ بات ہے کہ ہستی مٹتی نہیں ہماری

صدیوں رہا ہے دشمن دور زماں ہمارا

 

اقبالؔ! کوئی محرم اپنا نہیں جہاں میں

معلوم کیا کسی کو درد ِنہاں ہمارا