Sarzameen e yaas by Sahir Ludhianvi|سرزمین یاس-ساحر لدھیانوی

سرزمین یاس-ساحر لدھیانوی
Sarzameen e yaas by Sahir Ludhianvi

 

جینےسےدل بیزارہے

ہرسانس اِک آزارہے

 

کتنی حزیں ہےزندگی

اندوہگیں ہے زندگی

 

وہ بزمِ احبابِ وطن

وہ ہم نوایانِ سخن

 

آتےہیں جس دم یاداب

کرتےہیں دل ناشاد اب

 

گزری ہوئی رنگینیاں

کھوئی ہوئی دلچسپیاں

 

پہر وں رُلاتی ہیں مجھے

اکثرستاتی ہیں مجھے

 

وہ زمزمےوہ چہچہے

وہ روح افزاقہقہے

 

جب دل کوموت آئی نہ تھی

یوں بےحسی چھائی نہ تھی

 

کالج کی رنگیں وادیاں

وہ دل نشیں آبادیاں

 

وہ نازٹینان وطن

زہرہ جنینانِ وطن

 

جن میں سےاک رنگین قبا

آتش نفس،آتش نوا

 

کرکےمجت آشنا

رنگِ عقیدت آشنا

 

میرے دلِ ناکام کو

خوں گشتٔہ،آلام کو

 

داغ جدائی لےگئی

ساری خدائی لےگئی

 

ان ساعتوں کی یاد میں

ان راحتوں کی یاد میں

 

مغموم سارہتاہوں میں

غم کی کسک سہتاہوں میں

 

سنتاہوں جب احباب سے

قصےغِم ایام کے

 

بیتاہوجاتاہوں میں

آہوں میں کھوجاتاہوں میں

 

پھروہ عزیز واقربا

جوتوڑکرعہدوفا

 

احباب سےمنہ موڑکر

دنیاسےرشتہ توڑکر

 

حِدّاُ فق سےاُس طرف

رنگ شفق سےاُس طرف

 

اک وادی خاموش کی

اک عالمِ بے ہوش کی

 

گہرائیوں میں سوگئے

تاریکیوں میں کھوگئے

 

ان کاتصور ناگہاں

لیتاہےدل میں چٹکیاں

 

اور خوں رلاتاہےمجھے

بے کل بناتا ہے مجھے

 

وہ گاؤں کی ہمجولیاں

مفلوک دہقاں زادیاں

 

جو دستِ فرطِ یاس سے

اوریورشِ افلاس سے

 

عصمت لٹاکررہ گئیں

خودکوگنوا کررہ گئیں

 

غمگیں جوانی بن گئیں

رسوا کہانی بن گئیں

 

ان سےکبھی گلیوں میں اب

ہوتا ہوں میں دوچارجب

 

نظریں جھکا لیتاہوں میں

خود کوچھپالیتا ہوں میں

  

کتنی حزیں ہے زندگی

اندد ہکیں ہے زندگی